Joh 3 | AAI | STEP | Jew hai ukwarin orot wabin Nicodemus i Pharisee ana kou’ayamaim orot ta.

a 3.1 Jn 7.50; 19.39

b 3.3 Mat 18.3; 1Pet 1.23

c 3.5Ezk 36.25-27

d 3.6 Jn 1.13

e 3.14Num 21.9; Jn 8.28; 12.32

f 3.15 Jn 20.31

g 3.16 Jn 3.36; 10.28; Rom 5.8; 8.32; 1Jn 4.9-10

h 3.17 Luk 19.10

i 3.18 Jn 5.24

j 3.19 Jn 1.5, 9; 8.12

k 3.22 Jn 4.1-2

l 3.28 Mat 11.10; Jn 1.20

m 3.31 Jn 8.23

n 3.32 Jn 3.11

o 3.35 Mat 11.27; Jn 5.20

p 3.36 Jn 3.16-18; 1Jn 5.12

John 3

Jesu, Nicodemus Bi’obaiy

1 ^aJew hai ukwarin orot wabin Nicodemus i Pharisee ana kou’ayamaim orot ta. 2 Guguminamaim na Jesu biyan tit, naatu eo, “Bai’obaiyenayan, aki aso’ob o i bai’obaiyenayan God biyanane ina. Men yait ta karam boro ina’inanen fairih o kusisinafube nasinaf, God men hairi hinama’am na’at.”

3 ^bMar ta’imonamo Jesu iya’afut, “Ayu tur anababatun a tur ao’owen, men yait ta boro God ana ma’ama wanatowan na’itin, baise i boro natufuw maiye’ebo.”

4 “Orot ra’at gagamin na’in ema’am, boro mi’itube natufuw maiye?” Nicodemus ibat. “Men karam hinah yan wanawanan narun mar bairou’abin natufuw maiye!”

5 ^cJesu iya’afut eo, “Turobe a tur ao’owen, men yait ta boro God ana ma’ama wanatowan narun, baise i harew naatu Anuninamaim natufuw. 6 ^dBiyat etatoub, i biyat eya’iy, baise Anun Kakafiyin etatoub Anun Kakafiyin iya’iy. 7 O boro men ita’ororsa’ir ayu tur iti tufuw maiye ao isan. 8 Waruw ana kokomaim ebababin. O i nidun kunonowar, baise o men karam boro inao, i menane na enan, o au mena’at babin enan. Imih orot babin anunihine i nati na’atube tetutufuw.”

9 Nicodemus i bat, “Iti i mi’itube?”

10 Jesu eo, “O i Israel hai bai’obaiyenayan naatu o iti sawar men imanamamih?” 11 Jesu iya’afut eo, “Ayu turobe a tur ao’owen, aki abisa asoso’ob i a’o, naatu abisa aki a’i’itin i isan a’o, baise kwa i boro’ika aki ai tur naniyan men kwabaibimih. 12 Ayu tafaram ana sawar isah ao kwanowar baise kwa men kwabitumatum. Kwa boro mi’itube kwanitumatum ayu mar ana sawar isah ana’o na’at?” 13 Men yait ta in mar run, baise orot Natun marane nan akisinamo. 14 ^eMoses mi’itube arar yan kok bora’ah na’atube, orot natun hinabora’ah nayen, 15 ^fsaise iyabowat i tebitumatum boro ma’ama wanatowan hinab.

16 ^gGod tafaram iyabuw kwanekwan imih i Natun ta’imonamo iyafar na, saise yait i ebitumitum boro men namorob, baise boro yawas wanatowan nab. 17 ^hGod i men tafaram bai’afiyin isan Natun iyafar na tafaramaim titamih, baise tafaram baiyawasin isan na tit. 18 ⁱO yait I kubitumitum boro men ina’afemih, baise o yait men ebitumitum i eaf sawar, anayabin i men God Natun Ta’imon, i akisinamo wabin itumitumamih. 19 ^jIti i baib’afiyen. Marakaw na tafaramamaim tit, baise orot marakaw efanin gugumin iyabuw anayabin hai sinaf kakafih.

20 Orot babin etei sinaf kakafih tesisinaf i marakaw hikwahir naatu boro men hinan marakaw wanawanan hinarun, tebirubir hai sinaf boro hinirerereb. 21 Baise yait ta turobe’emaim ema’am marakaw wanatowan erur, saise i ana bowabow God wanawananamaim bowabow boro nirerereb.

John Baptist, Jesu Isan Eorerereb.

22 ^kIti ufunamaim, Jesu ana bai’ufununayah bairi hitit hin Judea tafaram ufunane hirun, nati’imaim mar kikimin hima naatu bapataito itih. 23 Nati’imaim John auman tafaram Aenonamaim sabuw bapataito bitih, Salim i men ef yok i sisibinamaim, anayabin nati’imaim i harew moumurih, naatu sabuw i nan ufun hinan bapataito bain isan. 24 (Iti John dibur hiyaru’uy ma’am nanamaim.) 25 John ana bai’ufununayah afa naatu Jew sabuw afa wanawanahimaim gamin matar, bapataito ana ofafaren isan. 26 I hina John biyan hitit naatu hi’o, “Bai’obaiyenayan, orot nati o airi no Jordan harew rounane menatan isan o i’o’orerereb, i boun bapataito sabuw ebitih, naatu sabuw etei i isan tenan.”

27 Nati isan John iya’afut eo, “Orot abistanawat marane tebitin iwat nab. 28 ^lKwa taiyuw i karam ayu ao i kwanao’rereb, Ayu i men Keriso, baise ayu i nanamaim hiyafaru ana. 29 Babin orot ana rum hi’o ema’am, orot ana of menatan i bai’awaninamih i orot isan ma tainin rub ma ekakaif, naatu i ana rum fanan enonowar ana veya i anababatun ekakawasa. Iti kawasa i ayu nowau, naatu kawasa i boun ana yomanin a’asa’ub. 30 I ana fair ra’at natabiru, ayu fair i men ra’at.”

31 ^mYeit auyomane nan i ra’at etei natabirih, menatan iti tafaramane nan i tafaram nowan, naatu tafaram ana sawar isah i ebidudur. Menatan marane nan i sawar etei tafahimaim. 32 ⁿI abis nonowar, i’itanen i isah eo’orerereb, baise men yait ta ana tur ebaibimih. 33 Orot yait ta i ana tur nabitumitum na’at, i ebi’obaiyit i ebitumatum God abistan eo’o i turobe. 34 Menatan God biyafar i God ana tur eo’orerereb; anayabin God i Anun i nowanamih itin anababatun 35 ^oTamah Natun iyabuw kwanekwan naatu sawar etei i ana fair babanamaim ya. 36 ^pYait ana baitumatum Natunamaim naya’iy boro yawas wanatowan nab, baise yait ta God Natun nabifutuw boro men yawas nitinimih, God ana yaso’ar tafahimaim nama.